「兄弟姊妹」父母留給你們最好的禮物

已更新:2020年12月10日


(資料圖片)


「我係獨生,父母離異,典型80後,育有一女一子。」

相信唔少香港人同我一樣現在嘅背景差不多,自己係獨生子女,好希望生一對仔女。點解?因為兄弟姊妹係父母留畀你最大嘅禮物。曾經有人講過,人生中有兩股堅強嘅力量係完全不求回報,一種就係父母無私嘅愛,另一種就係兄弟姐妹嘅手足之情。小時候同兄弟姐妹一起玩耍、一起闖禍、一起長大,都係童年時最美好同珍貴嘅回憶。

細細個幻想過自己有個阿哥、家姐,咁我就會有哥哥姐姐錫,可以一齊玩、一齊成長。後來父母離異,爸爸因為病過世,媽媽另築家庭,而我就開始過住一個人的生活。細個未感受到兄弟姊妹有多重要,只係希望有個伴一齊玩,大個當父母慢慢離開自己,呢個時候就發覺原來得返自己一個人... 當我結婚嗰刻,我就決定一定要生兩個小朋友,將來當我離世後,佢哋仲有個「手足」互相扶持。



(資料圖片)


兄弟姊妹之間嘅感情,係與生俱來,就係所謂嘅「血濃於水」。即使有一日父母離去、愛人始亂終棄、朋友背道而馳,至少你仲有兄弟姐妹嘅親情,永遠唔會失去。兄弟姊妹之間嘅感情係一世,可能鬧過千次文,打過無數嘅交,亦可能因父母偏心而你憎我恨,但唔好忘記,無論生活有幾艱難,至少你都唔係孤軍作戰。即使彼此之間有矛盾,只要叫一聲「哥哥」「姐姐」就冰釋前嫌,「一家人」始終係一家人,永遠都血脈相連,呢個就係上天給予最好嘅眷顧。