媽媽都是「戀腳癖」?

已更新:2021年1月14日

「每個媽媽都有戀腳癖!」

呢句說話一點都無誇張,喺媽媽眼中,一對滑滑嘅雞脾仔,兩串圓碌碌嘅粒粒提子,加上一陣陣嘅BB奶味,睇見真係流晒口水。


媽媽愛咬BB臭汗腳仔

BB身上有陣香香地(只限媽媽眼中)嘅奶香味,真係好治癒!邊幾個位置最「臭」?耳背、後頸、腋下、腳趾罅,尤其係佢哋出完汗之後索一索,個陣味仿如世上最難忘嘅味道。肉緊起上來,媽媽更會咬BB腳仔,總之喺媽媽眼中BB實在太吸引!


點解每個媽媽都有戀腳癖? 媽媽點止有戀腳癖吖,其實每個媽媽都有「戀孩癖」,BB兩歲後身上嘅氣味就會隨着佢嘅發育成長、飲食關係等而慢慢改變,而BB大得實在太快,呢個可愛嘅畫面轉眼間就過,我哋只係太愛自己嘅小孩,唔捨得佢哋大得太快。


有哺乳類動物專家研究指出,雌性哺乳類動物因為生產後受荷爾蒙影響,出現「母性大發」,對幼兒產生愛嘅表現,而哺乳類動物進化演變中,幼兒因為求生而進化出可愛的特徵,例如:圓眼、圓手、圓腳,令媽媽對幼兒產生濃濃嘅愛,所以為何媽媽對孩子會特別肉緊。


其實短暫嘅BB臭汗味係代表幸福嘅味道,網上有媽媽分享話幫小孩著對襪焗一焗後,再聞,會更臭更爽,大家不妨試下啦!