小朋友就黎開學 揀咩書包好?

已更新:2021年9月8日



小朋友就黎開學就會有一堆物品要買,好似書、文具、校服同書包。如果佢唔係去新學校,基本上除左書其他嘅只要冇壞、冇唔啱身用番原本都得,唔一定要再買。不過,依家小朋友用個個書包有冇問題呢?如果要買新嘅,有咩值得留意?如果小朋友孭唔啱嘅書包、姿勢唔啱,就好容易造成腰酸背痛或脊骨退化,長遠影響健康架。


點樣先係啱嘅書包?


1. 大細要適中

書包嘅size要適合小朋友身形,揹帶和同腰帶之間嘅距離都應該符合到佢嘅身高。不好買太大嘅書包比身形細而要帶嘅物品唔多嘅小朋友,如果書包太大,剩餘空位較多,行路時會好累贅,物品都可能會移位,就會孭得唔舒服。



2. 符合人體工學

就算買標榜人體工學嘅書包,買之前,都要試孭睇下同小朋友背部脊椎曲線貼唔貼,咁先適合。



3. 揹帶要夠闊同穩震

揹帶要夠闊同有厚墊,不好分得太開甚至橫過肩膀,而質地要軟身又唔會容易扭絞,能夠貼合到小朋友嘅嘅上半身,咁樣就可以減輕膊頭嘅壓力;如果太幼有機會勒傷,書包重個陣都會唔舒服。 揹帶長度最好可以調校,因為如果太長,書包重心就會向後移,影響小朋友嘅姿勢,同埋,揹帶應該配埋塑膠造嘅帶扣,留意埋佢可唔可以固定到揹帶,避免愈用愈鬆,仲有冇尖銳嘅部分就安全啦。



4. 腰帶、背墊都重要

除左揹帶,小朋友孭書包應該仲要扣埋書包附設嘅胸帶同腰帶。扣腰帶更加重要,因為書包重會向下墜,貼近盆骨,扣好腰帶可以將重量平均分佈。而且,書包背片要夠闊、軟硬適中,可以貼住小孩膊頭,咁樣支撐力先會夠,唔會造成背部嘅負擔,又唔會向後拉扯,造成頸部受傷。



5. 材質要輕巧

衞生署建議學童唔應該長時間背負重量超過體重15%嘅書包,而且長時間背負過重嘅書包, 有機會造成身體疲勞或腰背痛。所以,書包嘅質料要輕巧。

6. 拉鏈要易拉

揀書包嘅時候記得要試書包每條拉鏈係咪暢順,拉鏈縫線同接合處要結實,唔易分離。開口夠唔夠闊,攞野就唔就手。


7. 間隔實際

書包應該要有間隔同額外嘅暗格,方便將物品分開擺放同重量平均分佈、容易找尋。如果書包嘅一邊放左水壺,另一邊最好放啲差唔多重量嘅物品,咁樣避免兩邊膊頭受力唔均勻而受傷;而有內袋亦都方便孩子分類同搵到需要嘅用品。


揀後揹式定係拉桿式書包就因人而異。拉桿式書包適合少行樓梯、多行平路嘅學生,如果課室喺高樓層,即係返學好多層樓梯,咁就應該揀後背式書包。




收納書包技巧

理想執拾書包方式,要留意聚力分佈,將愈重嘅物品(例如厚書、水壺)貼近背部,而輕嘅文具放喺書包最外層,就可以輕鬆慳力,而重量應平均分配喺兩個肩膊上面。


良好使用習慣

揀左個好嘅書包,執好所需物品,仲要有良好使用習慣同妥善保養。小朋友孭書包嘅時候要保持背部挺直,平時使用完要保養一下,例如落雨淋濕左,返到屋企要擦乾避免發霉,平時用防塵套包好避免積灰塵等等。





最新文章

查看全部