HK Staycation 5星級攻略 (持續更新...)

已更新:2021年11月29日


以前放暑假都諗下帶小朋友去邊度,甚至搭下飛機。今年淨係可以本地消費,不過趁放暑假,可以帶小朋友去番2、3日staycation,又有得玩又有得放鬆下。冇得搭飛機,不如考慮下洗多少少錢,同小朋友享受一個5星級假期啊!


HeSheKids同大家整合左唔同適合親子遊嘅5星級酒店同高價位酒店嘅最新package,佢地都各有特色:

主題房間

渡假聖地

Chill住玩

五星級享受


主題房間

1. 迪士尼酒店

暫時只有探索家度假酒店同香港迪士尼樂園酒店開緊。賓客入住其中一間酒店,可以玩埋其他酒店嘅康樂活動及設施。而且唔同房間同餐廳都有唔同風格,仲有迪士尼角色造型食物,相信大人細路見到都好開心。如果黎住1晚,可以預頭半日玩盡酒店設施,第2日去樂園玩番一日。


迪士尼探索家度假酒店

官網8月份房間價格:每晚$2550起(不包括服務費)

探索家度假酒店別具探險氣息,黎到會感覺置身異國。房間裝潢刻劃出亞洲、大洋洲、南美洲同非洲四個熱帶地區嘅特色。除左打卡,仲可以同小朋友去游泳池、主題庭園同「海底奇兵小天地」室內遊樂場放電添。呢度有中、西、輕食餐廳,價格比樂園酒店相宜。


香港迪士尼樂園酒店

官網8月份房間價格:每晚$3018起(不包括服務費)

成間酒店富有維多利亞式風格,一見到大堂就覺得好復古典雅,加埋沿海風景,真係賞心悅目!房間想有靚啲嘅景,都可以加多2、3百蚊住海景客房。


呢度有仲多設施去享受,包括有游泳池、按摩池、桑拿浴室同蒸氣室;如果想有親子活動,可以同小朋友去網球場及多功能球場打波;如果想散下步,可以去酒店後面以米奇為設計靈感嘅英式花園迷宮,路線都唔算短架,再沿海滂行,可以去埋渡輪碼頭欣賞海景添。酒店仲有獨有嘅娛樂活動:兒童活動中心會舉辦迪士尼主題活動同遊戲,欣賞經典迪士尼動畫電影;仲有夜晚嘅「迪士尼故事時間」。


2. 香港海洋公園萬豪酒店

官網8月份房間價格:每晚$1402起(不包括服務費);$2637起(主題的家庭客房;不包括服務費)

酒店比較新,只係開左2年幾。大堂有相當吸睛、高達15米嘅水族缸,仲有配有海底世界投影效果嘅互動螢幕,配合酒店海洋主題。普通房間都融合左舒適愜意的海洋裝飾元素,比較簡約,而想要2 張雙人床,就要比多幾百蚊;主題家庭客房就有特色啲,可以揀威威潛艇、小紅熊森林或者包包天地,都係海洋公園嘅「威威與好友」角色。

除左去樂園玩,唔好錯過超大面積嘅露天礁湖泳池,裡面有埋兒童及幼兒游泳池,大人都可以放心啲,仲有兒童遊樂天地,玩下潛艇造型嘅室內設施,但有時唔開放。


3. 香港港麗酒店 Conrad Hong Kong

官網8月房間價格:每晚$1211起;Little Conrad by Momonittu:$2,788起(Momonittu 豪華客房 (雙人大床或雙床);每位6至12歲的小童需另加$400元, 13歲或以上$1,200)



店同童衣美學品牌 Momonittu喺暑假推出「 Little Conrad by Momonittu」家庭住宿專案,設計主題豪華客房連Momonittu 童趣小帳篷。Package包括住宿、Momonittu 禮物組一份(精美砌圖、玩偶及保溫袋)、Momonittu 現金購物券、自助早餐及晚餐、房內迎賓果撻及果汁、夏日港麗小熊一隻同住期間享用Little Conrad Zone 玩樂房間一節。而「Little Conrad Zone」分為三個主題包括「Bouncy Room彈跳空間」、「Kids Room奇趣空間」同「Photo Room留影空間」。



渡假聖地

4. 香港愉景灣酒店

官網8月份房間價格:每晚$1913起(不包括服務費;含早餐)

香港愉景灣酒店位於離島,背山面海,如果想遠離繁囂,呢度不失為一個好選擇。鐘意游水可以喺酒店25米室外泳池或去附近嘅三白灣沙灘;想去郊外舒展身心,亦可以去附近嘅登山徑道好似愉景灣道同其他景;留喺酒店都可以試下入面cafe嘅Monchhichi主題下午茶,雖然有啲網友指食物一般,但環境、食物佈置都幾有心思嘅。




5. 香港黃金海岸酒店

官網8月份房間價格:每晚$1500起(不包括服務費);每晚$2480起(Peppa Pig主題客房連海景露台 (兩張單人床);包括早餐;不包括服務費)

香港黃金海岸酒店環境清幽,購物配套都好便利,而最大賣點相信係海灣怡人景色。黎到嘅遊客多數都會去沙灘玩、游水,或者去睇日落,但最近個度仲被發現有毒坑鯰魚群,行沙灘嘅時候要小心避免接近石灘啊!而且黃金海岸沙灘喺假日通常都會擠滿泳客,大家或者要提前安排下行程。

酒店內都有適合親子活動嘅設施,好似游泳池、兒童小火車、黃金海岸飛天鋼索、戲沙池、兒童閱讀閣、鯊魚冒險島、家庭單車租賃等,而原有兒童游泳池及滑水梯、黃金水動樂園、兒童扭扭車及三輪腳踏車及戶外駕駛樂依家暫停開放。雖然有啲係另外收費嘅,但價錢算合理,好似飛天鋼索係40蚊,可以玩2款唔同高度嘅滑索道各一次。


酒店仲特別設計多款親子主題客房,造型非常吸引,可惜官網顯示全部主題房間喺8月已經賣曬。不過仲有最新嘅Peppa Pig 黃金海岸夏日住宿計劃,可以入住Peppa Pig主題、坐擁海景景觀嘅客房,玩埋戶外攤位遊戲、親子Peppa Pig草裙設計工藝坊之餘,仲有Peppa Pig 旅行袋拎番屋企。


6. WM Hotel

官網房間價格:每晚2,490起(不包括服務費;包兩大一小精選早餐

酒店喺今個月啱啱開幕,位於西貢。建築外形具設計感,分「天寓」、「海寓」及「山寓」三座,依家首階段開放「海寓」,由豪華露台客房起所有房型都會連埋私家露台,有啲仲配備私人天台 ;設有海景餐廳、桑拿、蒸氣浴室等,而無邊際泳池都係一大特色,全長足足有75米長。但喺開幕初期餐廳只有限度提供餐飲服務,仲有聽有啲網友話自助早餐嘅選擇比較少,而Check in需要等一段時間,同有時執得唔夠仔細,留低少少頭髮、紙巾碎,所以配備同服務都有待改善。不過因為位置優勢、面臨海灣同設施配套,如果以上問題有改善,都不失係度假嘅好選擇。



Chill住玩

7. 東涌世茂喜来登酒店

每晚$990起(不包括服務費),$2150起(喜来登夏日學院,不包括服務費;包自助早餐)

開唔夠一年嘅喜来登酒店,設施幾齊全,位置又方便,鄰近好多地方去,好似有集合唔同品牌outlet嘅東薈城購物中心,除左可以行街,仲可以去坐昂坪 360觀賞大佛、行下大澳或者同酒店租架單車踩。而佢暑假package就係喜来登夏日學院,包房間、早餐同餐飲$600消費額,小朋友仲有唔同節目可以參加,好似朝早可以上中式、西式烘焙及烹飪堂,晏晝就參加專業面部彩繪/兒童紋身/ 美甲、和諧粉彩、星空願望瓶、製作草帽、等等手工藝活動; 或者去玩全日躍動遊樂區同充氣遊戲。


8. 港島海逸君綽酒店

每晚$2948/2人,加1名小童約$150加一 (9月15日,包早餐、下午茶、貴賓樓層服務)

位於北角嘅海逸君綽酒店位置優越,餐廳包括41樓LE 188° 同設施好似健身中心、室外游泳池、貴賓閣景觀開揚,由北角可以望到中環、尖沙咀部分嘅維多利亞港景色,欣賞日落同晚霞都十分悅目。酒店室外游泳池唔單止風景靚,仲幾大,有27米長,又有兒童嬉水池。推薦露台海景客房及套房住宿組合,因為房間有戶外超大露台,入面仲有坐到5、6個人、有按摩泡泡功能嘅浴缸,一邊浸浴一邊望住海景,幾chill!Package包早餐、下午茶同貴賓樓層服務。而呢款房型只接受電話或者電郵預訂,而且數量有限。截稿前去詢問酒店,原來8月已經賣曬,想星期六、日入住最快都要12月,所以預訂要趁早啊!


9. The Ritz-Carlton

官網8月份房間價格:每晚$2558起(不包括服務費);每晚$3234起(麗思兒童夏日探索之旅;不包括服務費;包括自助早餐)

Ritz-Carlton位於九龍環球貿易廣場103樓以上,係全港最高嘅五星級酒店,行到每個角落都可以飽覽城市景觀,彷如置身雲層。除左可以試下米其林一、二星餐廳,仲可以relax下,好似去鏡面天花及LED顯示器嘅室內無邊際游泳池玩下水,或者可以去奢華水療中心享受私人暖水浴按摩服務。喺房間同唔同設施都飽覽城市、海濱全景,相信好少冇邊幾間酒店會有。


而酒店最近都推出左露營體驗—麗思兒童夏日探索之旅,客人除左入住特級豪華海景客房或以上級別一晚,房間內仲設有原野探奇以及露營帳篷裝備。另外,可以玩Nintendo Switch設備同board game,包括Overcooked及Mario Party、及Scrabble Original等等;而小朋友可以免費參與一節麗思兒童夏日探索之旅包括了解工程師工作、獸醫工作或者Maître d'餐桌禮儀,3至6歲小童每房每晚又可以免費使用Wise-Kids遊戲室一節,同埋以每位每環節港幣$680可以參加埋「Fly High Dream High」兒童模擬飛行航空課程。


10. 香港君悅酒店

官網8月份房間價格:每晚$1600起(不包括服務費)

酒店坐落於香港島灣仔海旁,面向維多利亞海港;餐廳有一定質素,Club lounge有高層海景,而且不設時限,不過食物選擇較少,Tiffin供應自助餐,Grand 而Café食物選擇豐富;房間基本有40平方米大,而且可以加床,有足夠活動同瞓覺嘅空間,電視有超過40條電視及影音頻道,仲設有自助茗茶設備及Nespresso咖啡機、嵌入式迷你酒吧抽屜式雪櫃。

而如果想有親子活動,酒店設施最正就係私人兒童遊樂場,有長滑梯、韆鞦、平衡轉板、車仔等等,仲有長達50米嘅游泳池,如果怕水太深,可以同小朋友去小童池添。可惜未有家庭package,要喺酒店用餐可能要預多啲budget啦。




11. 九龍香格里拉大酒店

官網8月房間價格:每晚$1000起(不包括服務費);每晚$1700起(「與您「童」樂 家庭住宿優惠」;包早餐;不包括服務費)

品牌馳名嘅香格里拉都有為一家大細設計package同小朋友安排節目,好似優惠就有一系列兒童活動,如學習沖泡巧克力拿鐵技巧仲有跟極富經驗嘅酒店糕點師探索烘焙世界等等,而逢週六及週日,小朋友仲可以參加主題兒童嘉年華嘅手工藝品工作坊同其他有趣活動。如果要落booking,官網就load得比較慢,而且如果搜尋個一日冇房就要再重新搜尋,可以打電話去book。


12. 港島香格里拉大酒店

官網房間價格:每晚$2000起(不包括服務費);每晚$2550起(「繽紛家庭樂」不包括服務費);$6600起/2晚(「家庭逍遙樂」;不包括服務費)

港島嘅香格里拉酒店就有「繽紛家庭樂」呢個優惠,包STEM工作坊、創意學習班、體操班,STEM工作坊有得整下DIY,好玩又學到科學、工程等嘅知識。Package包兩位成人、一位每日早餐、每晚$1,000元酒店消費額、客房類別升級、24/30小時住宿;如果對節目冇興趣又有幾日連假,可以揀「家庭逍遙樂」住2晚,除左早餐、客房類別升級、24/30小時住宿,仲包外帶經典雙人下午茶、cafe TOO自助晚餐同家庭瑜伽班。有興趣嘅話就要send email去book,上官網都唔得。


同埋最近想去住嘅話,留意官網話按摩池、蒸氣桑拿同桑拿仲未開放,只有戶外泳池同健身中心可以用,仲有最好避開平日去,因為到8月14日嘅平日會進行裝修工程,之後直到10月31日酒店只接受星期五同六夜晚嘅booking。


13. 荃灣西如心酒店

官網8月房間價格:每晚$451起(不包括服務費)

官網STEM 夏日「知」旅親子住宿價格:每晚$1888 起(「如」家常滋味套餐;不包括服務費); 每晚$2088 起(Café Circles 自助晚餐;不包括服務費)


新界都有酒店推出包括STEM工作坊嘅package。酒店位於九龍半島西端,佇立喺大帽山與藍巴勒海峽之間,客房大部分景觀開揚,設施唔少得9 樓嘅戶外游泳池。

STEM 夏日「知」旅親子住宿有比小朋友參加嘅益智工作坊,仲包括精選早餐、消暑雪糕同埋豐富自助晚餐或「如」滋味套餐。


「童樂夢幻泡泡住宿套餐」


14. 香港瑰麗酒店

官網8月份房間價格:每晚$3800起(不包括服務費)

香港瑰麗酒店擁有8 間餐廳與酒廊,包括如果有留意酒店afternoon tea可能都有聽過嘅The Butterfly Room,同埋 Asaya、健身中心同泳池等休閑設施。 酒店價錢比較高,不過佢唔同在裝修設計精緻、偏復古英倫風,而喺香港冇幾多間酒店會好似佢咁,會有個無邊際、無遮掩海景泳池,現場睇相信幾震憾!由依家到2021年9月30日,同小朋友去入住可以參加兒童夏令營,比小朋友參加動物主題工作坊同環保主題歷險活動,親親大自然,或者創意、傳統點心、或者霓虹燈招牌工作坊等等,而且優惠包埋每天雙人早餐、Rosewood Explorers兒童迎賓禮物、免費加床、購物電子禮券同積分,如果喺酒店連續入住2晚,仲可以住多一晚。



五星級享受

15. 香港文華東方酒店

官網8月份房間價格:每晚$1963起(不包括服務費)

作為香港老牌五星級酒店,裝修設計富有東方色彩,高貴典雅,員工服務、餐廳水準、房間配套等都有一定水準,設施都好完善,有水療中心、健身中心同雙線道泳池。酒店位於市中心,可以揀海景客房欣賞維港美景。佢地為小朋友仲有特別提供服務,好似泳池旁邊嘅牆上會喺逢星期五至日下午 3 點至 4點放映卡通片、嬉水玩具、特別迎賓禮品、提供兒童餐單、填色冊和彩色筆、免費娛樂包括 DVD、遊戲主機和棋盤遊戲等等,非常細心!


16. The Mira Hong Kong

官網8月份房間價格:每晚$800起(不包括服務費);每晚$4280起(爐烤美饌露天奢華體驗;包括服務費、自助早餐)

美麗華酒店坐落香港尖沙咀核心,裝修設計行時尚型格路線,同好多5星級酒店一樣設有水療區、健身中心同游泳池。而今年嘅爐烤美饌露天奢華體驗睇落都相當吸引,因為佢包括一間豪華套房,仲可以喺大面積嘅陽台露營同玩充氣小型兒童戲水池,留喺舒適嘅房間抖下得,喺戶外曬日光或者睇星星又得,而且酒店主廚仲會現場即製西式烤爐美食做晚餐,又可以食埋真係可以大半日唔洗出房門口都得啊!如果想出去玩,都可以享用酒店其他設施,好似Mira Wanderland環球樂園有巨型俄羅斯方塊、籃球盛會、舞動節拍、夜光彩繪、空氣曲棍球等唔同遊戲可以玩,或者可以去附近商場行下,喺度住一定唔會怕小朋友悶!


17. 香港W酒店

官網8月份房間價格:每晚$1960起(會員價)每晚$2300起(「夏日满FUN」住宿套餐;不包括服務費)



香港W酒店作為精品酒店,建築風格精緻優雅又不失時尚。酒店以(Whatever/Whenever®)服務作原則,會盡力滿足客人需要,亦都歡迎2隻寵物入房;設有bliss®水療中心。位於 73 樓的FIT®健身中心設施、熱療及水療設施包括海景活力旋流按摩池同WET®室外恆溫泳池。訂房個陣可以揀「夏日满FUN」住宿套餐,萬享旅享家會員同行嘅兩位小童可以去KITCHEN餐廳或WOOBAR享用免費早餐,可以用$500水療消費額去bliss®水療中心享受指定療程,而小朋友同大人免費一齊去天際100觀景台、參加90分鐘高爾夫球體驗、或者以優惠價港幣$200參加「童」享跳舞舞蹈課程,套餐只限8月29日或之前嘅週六及週日; 仲可以得到酒店港幣$800餐飲消費額同$50儲值額型格W八達通。


18. 奕居 The Upper House

官網8月份房間價格:每晚$3300起(不包括服務費)

官網夏日家庭樂」房間價格:每晚$3600起(不包括服務費)

奕居名氣未必有之前幾間咁大,但其實深得唔少人歡迎,除左曾經有唔少國際明星入住,佢喺tripadvisor仲係排名第1嘅香港酒店。相信其中嘅原因係佢私隱度高,而且佢嘅裝修行日式簡約,採用暖和嘅燈光同香薰,而且直接上房check in,令人覺得有「家」嘅感覺。就算比較便宜嘅房間空間都好多,仲有好似如spa room嘅浴室。比較可惜嘅係酒店冇泳池、只有1間餐廳同lounge,想要多啲選擇要去附近商場。


夏日家庭樂」優惠,有包兩位成人、一位小童早餐、$800餐飲消費額、免費加設梳化床免費享用兒童菜單、週末親子瑜伽、同小童迎賓禮品,小朋友仲可以免費去鄰近Baumhaus遊戲室嘅木製樹屋玩一次。


19. 香港美利酒店

官網8月份房間價格:每晚$2664起(不包括服務費);每晚$3350起(仲夏「童」暢遊;不包括服務費)

雖然酒店只係開左2、3年,但前身係政府辦公大樓,建築喺1969年已經起好,因此好有歷史價值。風格典雅,好似大堂、房間浴室會用大理石配金色線條,係酒店嘅標誌之一。酒店配備健身及水療設備,同埋5間餐廳、酒吧。暑假推出仲夏「童」暢遊優惠,除左包2個大人1個小朋友住宿同每日早餐,仲有三人下午茶、三道菜晚餐、300元用於按摩及水療護理簽帳額,同埋可以參加兒童瑜伽班、繪畫班,同使用兒童遊戲室。酒店亦都係pet-friendly,可以帶埋小型犬或貓入住,去酒店旁嘅小草地玩都得!


20. 半島酒店

官網房間價格:每晚$2880起(不包括服務費)

【寰宇半島自在行: 重新邂逅】住宿禮遇體驗:每晚$3,880起(豪華客房或其他房型);或$5,380起(高級套房或其他套房),如有第三位客人加$1,390起或$390起(十一歲以下之小童客人),每場體驗(每位客人)收費為$600港元(以上不包括服務費

【悠然風雅】仲夏住宿:每晚$2980起(豪華客房);$3,380起(特級豪華客房),如有第三位客人加$1,100起(以上不包括服務費)

又一間大部分香港人都會聽過嘅酒店—半島酒店,因佢位於九龍半島嘅最南端而命名嘅。聽聞佢嘅staff服務質素高,而酒店嘅泳池好grand,雖然係室內,但非常空曠,而且有超大露台同落地大玻璃,可以望到寛闊嘅維港美景。



依家嘅房價真係比以前旅遊旺季平得多,趁呢個時候去見識下呢間接近一百年歷史嘅建築,同享受下入面五星級嘅服務同設備似乎唔錯喎,係咪?暑假去住嘅話可以考慮【悠然風雅】仲夏住宿早晨套餐、$1,000美食禮遇同$300半島水療禮劵,而以$600可以參加下任何一項雙人半島體驗,有室內高爾夫球、【和諧粉彩】或薄荷黏土製作;【寰宇半島自在行: 重新邂逅】住宿早晨套餐、$1,000美食禮,而入住一日,可選擇參加2項體驗,包括「由徠卡專業攝影師為你留影」、點心烹飪班、遠東貴婦深度遊 、奢華英倫跑車體驗等等。而半島酒店仲有個殺手鐧—就係有得比客人坐直升機!不過呢啲豪華體驗起碼要萬蚊起跳,就要大家自己斟酌啦。