「女兒係爸爸嘅前世情人」這句說話聽得多，一直感受不大，直到2015年女兒出世後，深深體會得到箇中嘅意思。仲記得結婚當天，外父帶着女兒步入紅地氈一刻，我站在遠方眼見外父眼泛淚光，當交女兒給我的那一刻，外父已哭成淚人。今天的我回想當日，終於明白作為爸爸對女兒嘅愛，既含蓄又泛濫。
雖然暫時女兒仲細，但心裏面已經有好多說話想對佢講...
1. 別讓男人糟蹋
愛情唔係人生嘅全部，沒有非佢不可、非他不嫁嘅道理，何況係一個令自己難過、傷心、流眼淚嘅男人，如果佢不愛你，請你離開，唔會浪費彼此寶貴嘅時間。
2. 愛情係世界上最現實，唔好傻到以為努力就會有回報
話社會現實，愛情更加現實。
我知道你可能好愛佢，但假使佢不愛你，一切都係廢話，你就算付出幾多都無人會感激。唔好等到你嘅愛消磨殆盡個一日先醒。愛，要放喺對的人身上。
3. 結婚唔係愛情嘅終點，而係幸福嘅開始
由拍拖到結婚當日，你可能會覺得你係天下間最幸福嘅人，無錯，的確當日你係世間上最幸福嘅人，但婚姻係一輩子嘅事，唔好以為結婚後，就能綁住對方一輩子，敢結婚就要有勇氣面對──可能會有離婚嘅一日，仍要為一輩子幸福而努力經營。
4. 女人要投資嘅係自己，而唔係男人
當你五十歲仲能夠維持三十歲嘅身材及容貌；當你年薪收入比你老公高得多；當你嘅生活過得比老公仲充實同精采；當你嘅夢想一步步實現時。婆媳問題、老公出現外遇偷食、婚後為別人而活等問題，都唔會係你在意同擔心。
5. 只有唔適合，無配不上嘅道理
每個女人都上帝嘅完美傑作，更係父母心中最寶貴嘅結晶，會嫌棄你嘅外表、睇唔起你嘅男人，亦無資格得到你嘅人同心。
6. 揀男人，要睇吵架後對你嘅態度
再恩愛嘅情侶夫妻都會有吵架嘅一天；曾經嘅山盟海誓同甜言蜜語，都會喺情緒失控嘅當下完全破滅。但可以喺唔開心嘅時候，仲願意放下身段及面子，主動道歉同為彼此建下台階嘅男人，一定唔差得去邊。
7. 你唔係車，唔需要為咗男人改來改去
你就係你，天生就係咁，你唔係車，唔需要迎合車主嘅感受同需求，來調整配備與舒適度，一定要做自己。
8. 揀錯老公比揾唔到老公，悲慘十萬倍
也許你睇住朋友，一個個都進入教堂，年過三十嘅自己，開始擔心自己嘅下半世，但相信我，寧願孤獨終身，都好過同一個對自己唔好嘅男人一齊。女人幸福並不一定要靠男人，你嘅幸福必須掌握喺自己手裏。
9. 千萬唔好做「第三者」
女人嘅愛係無價，一顆無價嘅心就換你一顆等價嘅心，對方只攞半顆心換你一顆心，公平嗎？能做個驕傲嘅女王，何必委屈自己去當個「第三者」呢？