新型冠狀病毒爆發已經滿一年，最近香港疫情緩和返，絕對值得慶賀！疫情至今，香港錄得210人染病死亡，而醫管局最近亦公佈全港累計有 1.1萬名確診COVID-19患者康復出院。即使康復，45.5%康復者出院後3個月嘅擴散肺活量仍較正常水平低，小部份人甚至只有正常人肺活量嘅三分一，而16.7%人係出院9個月後都未回復番正常肺功能。
睇嚟即使好返都會對身體造成一定影響，咁除咗多清潔同保持個人衛生之外，仲有咩方法可以減低染病機會呢？
自古根治疫情都係靠藥物同疫苗，雖然新型冠狀病毒疫苗早就推出市面，但因為臨床測試未完善，目前僅適合16-60歲人士接種，而香港嘅接種率到目前只有約一成半，距離全民防疫仲有一大段距離，以政府最近更有意向11-16歲青年研究接種疫苗，即刻睇睇網民對打針嘅意見啦！
網民A：「緊係打針啦，我地全家都會去打，你都唔想成世都要戴口罩㗎？宜家夏天咁鬼熱仲要戴口罩，真係想搞到人中暑暈低先安樂咩？好心啲人就唔好咁自私，全世界都打㗎啦，宜家仲有兩種針你揀，副作用你打卡介苗都會發燒㗎啦！」
網民B：「政府又話死咗人會有幾百萬補償，直家死咗成200人，個個都話唔關支針事喎，即係點呀？我打針死咗咁我老婆仔女食咩呀？再加上宜家好人好者，又冇中肺炎，打完針有機會死喎，我諗唔到原因要去打囉。」
網民C：「唔係我唔想打呀，我本身有長期病，醫生唔建議我去打，話驚有併發症喎，希望打得嘅快啲去打，等我地班長期病人出入醫院覆診果陣唔駛再提心吊膽啦。」
網民D：「如果打完針又有抗體又唔駛死，個個都爭住去打啦，唔打係因為臨床都未做好，就叫人去做白老鼠，打咗針唔死得嘅都可能又面癱又中風，宜家啲針買番離用唔哂，就話叫啲後生仔去打，但藥廠都講明唔建議18歲以下接種，仲有啲針錢都係我地班納稅人埋單㗎，兩個字：晒錢！」
綜合以上網民，大家似乎對於接種新型冠狀病毒疫苗有唔同意見，雖然目前接種與否全屬自願性質，但衷心希望疫情可以盡快完結，大家喺不久嘅將來可以除罩相見。