一名港媽喺網上投稿指，為咗培養孩子的自理能力，唔想佢做媽寶及港孩，由K1至現時K3，都堅持孩子自己孭書包。結果惹網友批評佢虐兒，呢位媽媽大呻冤屈。 該名媽媽於facebook專頁「生仔要考牌系列」投稿，表示主張小朋友要有自理能力，唔希望小朋友變成媽寶，大個咗後都唔識照顧自己，所以由孩子K1開始到現在讀K3，都要求佢「自己書包自己孭」。
媽媽坦言由小朋友讀K1開始，「我已經俾人話虐兒」，更曾有孩子同學嘅婆婆直斥，「睇唔過眼我咁對個仔」，她對此感到不忿︰「叫佢負返自己責任都有錯？難道你咩都幫佢做晒就係對佢好？」
兒子自己孭書包嘅習慣已維持咗一段日子，可是最近升讀K3後，佢看到其他同學嘅家長都會幫忙孭書包，於是就話「好攰，想我幫佢孭一陣」。但係港媽當下堅決拒絕，並教育兒子自己嘅事要自己做，況且升小一後都要自己孭書包。
另一位媽媽見到呢個情況，提議升小後可以用有轆的書包放係地上拉。可是港媽唔認同呢個建議，「我一定唔會買哩款書包俾小朋友，喺地下轆完又孭上身，唔係嘛？」然後佢又再次受批評，「到時個書包咁重，你唔幫佢孭，又唔俾佢喺地下拉，你點解要咁對個小朋友？」
港媽認為自己「又硬食了一嘢」，不過呢次經歷反令她對自己的想法更堅定。她暗地裏揶揄其他認為要幫小朋友孭書包嘅家長，「我都睇到另一件事，就係知道點解你小朋友已經K3，都仲要餵飯，幫換衫同著鞋襪；我亦都好期待欣賞你點樣幫小朋友孭書包孭到中學畢業。」
有網民認為長期要小朋友孭重書包後果嚴重，「書包輕就話姐。因聽過有小朋友背到條腰彎左。小朋友太細唔敢博。」大部分家長都認為讓小朋友自己孭書包可以培養責任感，「但大前提係個書包嘅重量佢可以承擔得到，而又唔會影響到身體」，亦有家長認為，「自己小朋友話攰想你幫下，你都拒絕咁就教育到佢好有責任感嗎？」各位家長又會唔會幫小朋友孭書包呢？
執書包訓練4步驟
第1步：將書包內用唔到嘅嘢清理係一邊
1.將書包裏嘅嘢全部倒出嚟，扔掉冇用嘅嘢（例如，糖紙、廢紙等）。
2.讓孩子自己去選出唔需要放喺書包嘅嘢，例如一本課堂上唔再學習嘅書，或者係功課和試卷，將呢啲嘢先放喺一邊，之後再整理。
第2步：將書包裏嘅嘢放喺合適嘅地方
1.列出常用嘅嘢，例如筆盒、水樽、毛巾等。
2.水壺一定要同書本分開放，如果水壺放在書包裏，萬一水壺蓋唔小心開咗，咁書包嘅書本就遭殃喇！
第3步：將所有嘅嘢分類別
1.將書包裏嘅嘢按類別分開放，例如，書本、筆記、零散嘅紙張、課外活動資料、美術用品，以及其他已經分好類嘅嘢東西。
2.如果孩子嘅書包好幾層，家長可以教孩子將每樣嘢安排到固定嘅位置。慢慢孩子就可以學識將其他東西放回原位。
第4步：通過定期執書包，保持書包有條理和保持整潔
1・定期與孩子一齊檢查書包直到佢可以獨立執書包。
2.定期執書包唔洗花太長時間，每星期選擇一日，讓孩子將所有零散嘅紙、零食包裝等從書包裏倒出嚟，然後放到合適嘅地方。