世衛指，0至3個月大嘅嬰兒，每日需要有14至17小時優質睡眠；12至16個月大嘅嬰兒，每日需要有12至16小時優質睡眠。充足嘅深度睡眠的確對BB嘅發育好重要，有咩方法可以氹BB快速瞓覺？
1. 營造安全感
胎兒喺媽媽體內嘅空間比較少，而且環境相對溫暖好多，畀到佢哋有好大嘅安全感。出世之後，環境變化太大，BB一時三刻難以適應，因此好容易感到不安。可以嘗試用嬰兒包巾包住BB嘅身體，令佢地產生更大嘅安全感，瞓得更安心。
2. 舒適環境
好多人會擔心BB凍，幫佢哋著得太多衫。但其實BB嘅體溫一般相比大人高1至2度，佢哋怕熱多過怕凍。特別係依家天氣開始熱，BB都會因為熱得滯而無法入睡。將睡房嘅溫度調節喺20至22度之間，環境舒適，能更快更易入睡。
3. 播音樂
喺BB瞓覺嘅時候，播一啲頻率一致嘅聲音（White Noise），如雨聲、海浪聲等，有助舒緩BB嘅情緒，令佢哋更加放鬆。另外，溫和嘅純音樂亦有同樣嘅作用。
4. 齊齊扮瞓
陪BB瞓覺嘅時候，盡量唔好撳電話，因為電話發出嘅光線或聲音，會吸引佢哋嘅注意，反而可能會令佢哋更精神，不願入睡。父母喺「陪瞓」嘅時候，不妨試吓扮瞓覺，畀BB有個安靜嘅環境之餘，仲可以呃到BB跟住一齊瞓覺。
5. 出動奶嘴
有時BB瞓瞓吓會突然醒咗，瞓唔返，不停哭鬧。父母可以俾奶嘴BB，安撫佢哋嘅情緒，平靜落嚟，就更容易再次入睡，而且瞓得更好。