小朋友啱啱開始返幼稚園，但到左課室門口話唔想返，一直捉住媽咪係咁喊，唔肯入去！其中一個原因就係離唔開父母所產生既分離焦慮。
小朋友同父母既者照顧者分離嘅時候，產生焦慮不安、傷心，就係「分離焦慮」。呢種感覺源自於嬰兒期大約五、六個月大，當父母離開嘅時候，對父母既依戀同埋抗議。因為嬰兒未喺心入面塑造父母既形象，所以就會好焦慮，以為佢哋唔會再返黎啦。
有研究指出，父母如果喺嬰兒期提供一個安全既情感連結，小朋友喺進入幼稚園嘅時候，會有更加好既適應能力。小朋友就會想探索新事物、容易同人相處。所以隨著年齡增長，小朋友了解到父母既離開只係暫時，也會比較容易適應。
BB最初離開熟悉既環境，到一個陌生既地方，難免會不安，有啲會喊、唔講野，或者有啲開頭有新鮮感、覺得好玩，但幾日之後就出現分離焦慮，唔同小朋友分離焦慮既情況可以唔同。而通常愈細既小朋友需要愈長既時間先可以完全適應，每個人既狀況同埋對父母既信任程度都有影響架。
5個方法幫小朋友消除分離焦慮
1. 增進親子關係
得閒多啲陪小朋友，好似陪佢玩、講故仔、帶佢出去玩。另外，留意下最近屋企有冇咩變動可能會造成小朋友既不安，可能多左細佬妹要照顧、爸媽嗌架、搵左第二個湊佢，小朋友就會擔心失去愛既感覺，當同父母分離嘅時候就會更加不安。如果有呢啲情形，就要比小朋友感受到關懷同埋支持，先有可能減少分離焦慮。
2. 培養小朋友降低分離焦慮既方法
可以比一樣物件佢，好似係曾經送比佢既禮物或者佢鐘意既公仔，話比佢聽如果佢掛住你嘅時候，望住佢就好似你陪伴緊佢，或者可以同老師傾訴、同其他小朋友玩。
3. 離開小朋友嘅時候要表現好溫暖而堅定
離開嘅時候攬下佢，溫和但明確話佢知咩時候一定會黎接佢，希望佢乖乖同小朋友玩，比啲信心佢做得到，然後先將佢交比老師。
4. 比佢習慣下父母暫時唔喺度既感覺
好似帶佢放電嘅時候同小朋友玩捉迷藏，比佢體驗下父母暫時唔喺度但會再出現既感覺。
千祈唔好：
1. 偷走
唔好諗住趁小朋友睇唔到就偷走，揼低佢比老師算，小朋友反而會因為唔肯定父母咩時候會喺度、咩時候會走，而不安既感覺更加嚴重。
2. 呈現不安
雖然小朋友年紀細，但都會感受到父母既情緒，父母既不安會傳染比小朋友。
3. 用大人既情感威脅、忽視小朋友既情感
小朋友呢個時候比較脆弱，大人如果同小朋友講：「你再喊我就唔帶你返屋企啦！」，或者話「我唔理你啦，由得你喊」，之後走左去，態度強硬，亦都忽視左小朋友既情感。
4. 威脅處罰
如果同小朋友講：「聽日你又喊既話，返屋企要罰企架啦！」反而會令小朋友仲驚，增加分離焦慮。因為佢哋本身就冇安全感，呢啲說話或者行為，仲令佢哋覺得爹哋媽咪唔愛自己。
5. 以理說服
有啲父母會話「你大個啦！乖啦，唔好喊呀！」雖然小朋友的確應該學習成長，但係佢地聽到呢啲期望可能會覺得父母冇了解佢地既感受，唔著緊佢。
小朋友唔想返學既原因可以唔同，甚至有時可能好簡單只係瞓唔夠，或者唔鐘意學校既茶點。最重要記得同小朋友傾下，了解真正既原因，小朋友就日日都可以開開心心去返學啦。