唔同年齡、唔同發展階段嘅小朋友對做家務嘅態度係唔同嘅：2歲嘅小朋友想證明自己、想要參與大人嘅事情，所以佢哋好想幫忙，家長唔肯比佢哋做還會唔高興、生氣；3到5歲嘅可能仲想積極參與，亦更有能力學習。如果之前冇做家務嘅習慣，小朋友到左5歲之後，佢哋嘅認知就變成係家務同佢哋無關，做功課、學習同遊戲先係屬於小朋友嘅事情，唔會看見有家務要做就主動幫忙。
但係，好多父母唔比2、3歲嘅小朋友幫忙，直到小朋友5歲嘅時候開始要求佢哋幫忙，但可能已經要用催促嘅方式啦。所以，要訓練小朋友做家務，應該由佢哋2歲開始賦予佢哋做家務嘅責任， 比佢哋抺枱、收拾餐具，做完之後比佢哋讚美同感謝。咁樣佢哋從小就參與做家務、同父母合作整理家居，完成之後感到滿足﹐自然會一直喜歡呢件事，並培養習慣。
如果小朋友喺大約5歲以前，仍有興趣參與嘅嘅時候冇養成做家務嘅習慣，就需要重新定義做家務嘅正面意義，引導小朋友參與。因為好多家庭定義家務係媽媽嘅工作，或者如果小朋友做家務之後冇得到成就感，會覺得家務係苦差事。父母可以一步一步鼓勵，比小朋友重新認識做家務嘅意義：
1. 要求佢哋幫忙嘅時候改變講法
唔好講「幫媽媽收拾」、「幫爸爸抺枱」，改為「我哋一齊去收拾」，唔好比小朋友覺得家務係大人嘅事，而係全部家庭成員一齊完成嘅。
2. 唔好強迫佢哋做家務
唔好因為小朋友拒絕、唔認真而催促、或者責罵，咁樣佢哋只會覺得係負擔同埋害怕。可以一齊安排時間同次數，亦可以比佢哋了解現況或者後果，好似「你選擇唔做，其寶媽媽亦可以唔做，想休息一下。」、「你唔想做，我唔會嬲，但咁樣我哋嘅屋企就會愈黎愈污糟。」
3. 強調做家務嘅原因
鼓勵小朋友做家務嘅時候，話比小朋友知將地板清潔乾淨之後會好舒適；整理完衣櫃之後衣服會更加整齊、容易搵到。亦可以喺完成之後，同小朋友分享成果，比佢哋明白做家務嘅好處，亦會覺得因為做家務可以得到滿足。
4. 喺小朋友參與之後多加鼓勵
喺小朋友參與之後馬上表示讚賞，肯定佢哋嘅進步，例如，「呢次摺Ｔ恤摺得好好，有進步左喎！今次我哋一齊摺外套啊！」、「你先由拖地開給學，下次再一齊掃地。」，佢哋完成之後得到肯定，就可以維持對做家務嘅熱情。
家庭嘅價值觀好影響小朋友嘅想法。只要小朋友心目中唔覺得做家務係苦差事，而係對「我哋」美好家庭嘅付出，亦係大家都有責任完成嘅，小朋友就自然會主動做家務啦！